हरेक वर्षझैँ यस वर्ष पनि नयाँ वर्ष २०८३ को अवसरमा OXON Nepali Community ले अप्रिल ११ मा शुभकामना आदान–प्रदान कार्यक्रमको आयोजना गर्यो। कार्यक्रमको सुरुवात संस्थापक अध्यक्ष श्री चित्रा थापा ज्यू र पूर्व अध्यक्ष श्रीमती पद्मा लिम्बु ज्यूद्वारा दीप प्रज्वलनसँगै, नानी–बाबुहरूले प्रस्तुत गरेको नेपाली राष्ट्रिय गानबाट गरिएको थियो।

यसै क्रममा समुदायका बालबालिकाले मौलिक नेपाली नृत्य, आधुनिक गीत–संगीत, तथा गायन प्रस्तुति दिएर कार्यक्रमलाई झनै रंगीन बनाएका थिए। कार्यक्रमभरि नेपालकै झल्को आउने लोकसंगीतमा रमाउँदै, उपस्थित सबैले एक–अर्कालाई नयाँ वर्ष २०८३ का हार्दिक शुभकामना आदान–प्रदान गरेका थिए।

विदेशी भूमिमा बसेर पनि आफ्नो संस्कृति, पहिचान र समुदायप्रतिको माया जोगाइराख्ने सबै सदस्यहरूको सहभागिताले यो कार्यक्रम स्मरणीय, आत्मीय र हृदयस्पर्शी बन्न सफल भयो।